উত্তৰ কোৰিয়াই নিজৰ তথাকথিত নতুন চহৰ জিলা পিয়ংইয়াঙত পশ্চিমীয়া শৈলীৰ বিয়েৰ পাব আৰু আন কেইবাটাও আধুনিক সুবিধা প্ৰদৰ্শন কৰিছে। জাপানত ভিত্তি কৰি থকা উত্তৰ কোৰিয়া সমৰ্থক কাকত চ’ছন চিনবোৰ ফটো আৰু এটা প্ৰবন্ধৰ ভিত্তিত য়নহাপ সংবাদ সংস্থাই প্ৰকাশ কৰা অনুসৰি নতুন জিলাখনত ৰাস্তাৰ কাষৰ দুটা বিশিষ্ট পাব, আতচবাজীৰ দোকান আৰু কেইবাখনো বৃহৎ ৰেষ্টুৰেণ্ট আছে।
২০২১ চনত উত্তৰ কোৰিয়াই নতুন চহৰ উন্নয়নৰ অংশ হিচাপে বছৰি ১০ হাজাৰ নতুন এপাৰ্টমেণ্ট নিৰ্মাণৰ এক অভিলাষী পদক্ষেপ ঘোষণা কৰিছিল, যাৰ লক্ষ্য আছিল মুঠ ৫০ হাজাৰ। এই প্ৰকল্পৰ দ্বিতীয় পৰ্যায়ৰ কাম চলিত বৰ্ষতে সমাপ্ত হয়। বাতৰি কাকতৰ বৰ্ণনা অনুসৰি ৰাজধানীৰ উত্তৰ-পূব অংশৰ হৱাছং জিলাৰ মাজমজিয়াত ৰিমহুং ষ্ট্ৰীটত অৱস্থিত এই পাবটোৰ মাজত বাহিৰৰ টেৰেচকে ধৰি পশ্চিমীয়া শৈলীৰ পৰিৱেশ আছে।
জিলাখনৰ আন এটা সুপৰিচিত স্থান হ’ল আতচবাজীৰ দোকান, য’ত ৩০টাতকৈও অধিক বিভিন্ন ধৰণৰ আতচবাজী উপলব্ধ। মে’ মাহত উত্তৰ কোৰিয়াৰ চৰকাৰী কোৰিয়ান চেণ্ট্ৰেল টিভিয়ে ষ্ট’ৰৰ শ্বেলফত প্ৰদৰ্শিত দেশখনৰ সৰ্ববৃহৎ আন্তঃমহাদেশীয় বেলিষ্টিক মিছাইল হৱাছং-১৭ৰ দৰে ডিজাইন কৰা আতচবাজীৰ ফুটেজ সম্প্ৰচাৰ কৰিছিল।
তথাপিও কাকতখনে নতুন এপাৰ্টমেণ্টসমূহৰ ভিতৰৰ কোনো তথ্য প্ৰকাশ কৰা নাছিল। সোমবাৰে চৰকাৰী সংবাদ মাধ্যমৰ বাতৰি অনুসৰি উত্তৰ কোৰিয়াই অহা মাহত মূলতঃ দেশখনৰ সংবিধান সংশোধনৰ বাবে এক গুৰুত্বপূৰ্ণ সংসদীয় বৈঠক অনুষ্ঠিত কৰাৰ কথা ঘোষণা কৰিছে।
কোৰিয়াৰ কেন্দ্ৰীয় সংবাদ সংস্থাই প্ৰকাশ কৰা অনুসৰি অহা ৭ অক্টোবৰত পিয়ংইয়াঙত চতুৰ্দশ উচ্চতম জনসভাৰ ১১ সংখ্যক অধিৱেশন অনুষ্ঠিত হ’ব। জানুৱাৰী মাহৰ এছ পি এ(SPA)ৰ বৈঠকৰ সময়ত উত্তৰ কোৰিয়াৰ নেতাগৰাকীয়ে সংবিধান সংশোধনৰ পোষকতা কৰে যিয়ে দক্ষিণ কোৰিয়াক ইয়াৰ “অপৰিৱৰ্তিত প্ৰধান শত্ৰু” বুলি অভিহিত কৰিব আৰু যুদ্ধৰ ক্ষেত্ৰত দক্ষিণ কোৰিয়াৰ ভূখণ্ড “সম্পূৰ্ণৰূপে দখল” কৰাৰ প্ৰতিশ্ৰুতি আনুষ্ঠানিক কৰিব। কিমে একত্ৰীকৰণ সম্পৰ্কীয় বিধানসমূহ আঁতৰাই পেলাবলৈ আৰু সাগৰীয় সীমাকে ধৰি দেশৰ ভূখণ্ডৰ সীমা পুনৰ সংজ্ঞায়িত কৰিবলৈ সাংবিধানিক সংশোধনীসমূহ পুনৰীক্ষণৰ নিৰ্দেশ দিয়ে।
বিভিন্ন ডিজিটেল প্লেটফৰ্ম, ৱেবছাইট, সাংবাদিক, আৰু সংস্থাৰ পৰা বাতৰি সংগ্ৰহ।
