মঙলবাৰে প্ৰকাশিত এক নতুন অধ্যয়নত প্ৰকাশ পাইছে যে গুৰুতৰ Covid-19 সংক্ৰমণৰ স্থায়ী শাৰীৰিক আৰু মানসিক প্ৰভাৱৰ বাবে মগজুৰ ঠাৰি—মগজুৰ ‘নিয়ন্ত্ৰণ কেন্দ্ৰ’ৰ ক্ষতি দায়ী। কেম্ব্ৰিজ আৰু অক্সফৰ্ড বিশ্ববিদ্যালয়ৰ গৱেষকসকলে কোভিড-১৯ৰ ক্ষতিকাৰক প্ৰভাৱৰ তদন্তৰ লক্ষ্যৰে মহামাৰীৰ আৰম্ভণিতে গুৰুতৰ সংক্ৰমণত আক্ৰান্ত হৈ চিকিৎসালয়ত ভৰ্তি হোৱা ৩০ জন ব্যক্তিৰ মগজু পৰীক্ষা কৰিবলৈ আল্ট্ৰা হাই ৰিজ’লিউচন স্ক্যানাৰ ব্যৱহাৰ কৰিছিল।
*Brain* আলোচনীত প্ৰকাশিত তেওঁলোকৰ এই তথ্যই প্ৰমাণ কৰিছে যে SARS-CoV-2-এ শ্বাস-প্ৰশ্বাসৰ অসুবিধা, ভাগৰ আৰু উদ্বেগৰ সৈতে জড়িত মগজুৰ ঠাৰিৰ অংশত কেনে প্ৰভাৱ পেলায়। ক্লিনিকেল নিউৰ’ছায়েন্স বিভাগৰ অধ্যাপক তথা অধ্যয়নৰ সহ-নেতা জেমছ ল’ৱে কয় যে মগজুৰ ঠাৰি হৈছে আমাৰ সচেতন আত্মা আৰু আমাৰ শৰীৰৰ ভিতৰত কি চলি আছে তাৰ মাজত এক জটিল সংযোগ বিন্দু।
ল’ৱে লগতে কয় যে ক’ভিড-১৯ৰ প্ৰতি সঁহাৰি জনাই মগজুৰ ঠাৰিৰ পৰিৱৰ্তন কেনেদৰে পৰ্যবেক্ষণ আৰু বুজাৰ ক্ষমতাই আমাক অধিক ফলপ্ৰসূভাৱে ব্যাখ্যা আৰু দীৰ্ঘম্যাদী প্ৰভাৱৰ চিকিৎসা কৰাত সহায় কৰিব। মহামাৰীৰ আৰম্ভণিতে চিকিৎসালয়ত ভৰ্তি হোৱা কেইবাজনো ৰোগীৰ ক্লান্তি, উশাহ লোৱাত কষ্ট, বুকুৰ বিষ আদি আমনিদায়ক দীৰ্ঘদিনীয়া লক্ষণ দেখা গৈছিল।
দলটোৱে অনুমান কৰিছিল যে এই লক্ষণসমূহ আংশিকভাৱে মগজুৰ মূল ঠাৰিৰ নিউক্লিয়াছৰ ক্ষতিৰ ফল, যিবোৰ সংক্ৰমণ পাৰ হোৱাৰ বহুদিনৰ পিছতো স্থায়ী হৈ থাকে।
গৱেষণাৰ পৰা দেখা গৈছে যে মগজুৰ ঠাৰিৰ কেইবাটাও অংশত—যেনে মেডুলা অব্লংগেটা, পন্স আৰু মিডব্ৰেইন—স্নায়ুপ্ৰদাহজনিত প্ৰতিক্ৰিয়াৰ সৈতে জড়িত অস্বাভাৱিকতা প্ৰদৰ্শন কৰে। এইবোৰ পৰিঘটনা চিকিৎসালয়ত ভৰ্তি হোৱাৰ কেইবা সপ্তাহৰ পিছত আৰু মগজুৰ উশাহ-নিশাহ নিয়ন্ত্ৰণ কৰা অঞ্চলত সংঘটিত হৈছিল। মগজুৰ ঠাৰিৰ পৰিৱৰ্তনৰ সৈতেও ক’ভিডৰ পৰা ৰক্ষা পোৱা লোকসকলৰ মাজত হতাশা আৰু উদ্বেগৰ মাত্ৰা বৃদ্ধিৰ সম্পৰ্ক আছে।
ক্লিনিকেল নিউৰ’লজী বিভাগৰ ডাঃ কেটাৰিনা ৰুৱাই কয় যে এই প্ৰভাৱ “বয়স আৰু লিংগৰ পৰা স্বাধীন আৰু গুৰুতৰ ক’ভিড-১৯ ৰোগীৰ ক্ষেত্ৰত অধিক স্পষ্ট”। দলটোৱে কয় যে এই তথ্যই মাল্টিপল স্ক্লেৰচিছ আৰু ডিমেনচিয়াকে ধৰি মগজুৰ ঠাৰিৰ প্ৰদাহৰ সৈতে জড়িত অন্যান্য অৱস্থাসমূহো বুজিবলৈ সহায় কৰিব পাৰে।
বিভিন্ন ডিজিটেল প্লেটফৰ্ম, ৱেবছাইট, সাংবাদিক, আৰু সংস্থাৰ পৰা বাতৰি সংগ্ৰহ।
